L’angolo della Poesia

Cunziglie a nu poeta

Amico Poeta,

ca cirche na rimma,

nun scrivere primma

d’averce penzato.

Ma piènzece buono,

nun fa’ fessarie

e mièttece ‘a rimma

ch’è bona azzeccata.

Sì ‘mpont’ a nu vierzo

Vuò scrivere “ammore”,

nun mettere “core”,

ca rimma nun fa,

ma miètte “dulore”

e vanne cuntento,

ca sulo dulore

n’ammore po’ ddà.

Si po’ vai truvanno

na rimma sicura

pe’ fa’ na bravura,

pe’ nun te sbaglià,

allora, si ‘o vierzo

fernesce cu’ “core”,

oppure cu’ “ammore”,

cu’ “gioia”, “carezza”,

cu’ “bene sincero”

o cu’ “tenerezza”,

cu’ “vase”, cu’ “abbracce”,

cu’ “fuoco”, cu’ “fiamma”,

tu… mièttece “Mamma”

e vanne cuntento,

ca sulo na mamma

sti ccose po’ ddà!

S. Tolino